Vazhdojnë luftimet për kontroll të Mingora-s

Ushtria pakistaneze thotë se është përfshirë në luftime nëpër rrugë në qytetin e Mingora-s, qyteti kryesor në luginën Swat, ndërsa po përpiqet të ri-marrë kontrollin e zonës që është në duart e talibanëve.

Vendasit thonë se forcat që filluan sulmin të shtunën janë tani në kontroll të një korridori në një periferi të qytetit.

Një zëdhënës ushtarak, Athar Abbas, tha se operacioni në Mingora do të ishte i ngadaltë, pasi forcat e sigurisë donin të shmangin viktimat ndër civilë.

Qindra civilë kanë vdekur deri më tani dhe mbi një milion janë larguar nga Lugina Swat qëkur ushtria filloi operacionet në zonë.

Ndërkohë, autoritetet pakistaneze thonë se pesë militantë u vranë pasi një avion ushtarak bombardoi pozicione në rajonin Orakzai, në jug të Peshawar-it.