Hezbullahu hedh poshtë akuzat

Lëvizja libaneze, Hezbullah, ka hedhur poshtë pretendimet e bëra në një revistë gjermane se hetuesit e OKB-së tani besojnë se grupi është përfshirë në vrasjen e ish kryeministrit, Rafik Hariri.

Një deklaratë e Hezbullahut e hodhi poshtë njoftimin si fabrikim të pastër dhe tha se kishte dalë në kohë për të influencuar zgjedhjet libaneze në Qershor.

Njoftimi i bërë në Der Spiegel thotë se komisioni i OKB-së që heton vrasjen e zotit Hariri ka gjetur prova të reja që tregojnë se atentati ishte planifikuar dhe ekzekutuar nga Hezbullah në 2005.

OKB ka refuzuar të komentojë mbi njoftimin e bërë në Der Spiegel.

Komisioni më herët tha se kishte prova që tregonin për përfshirje të shërbimeve sekrete siriane dhe libaneze në vrasje.