Tifozët e Çellzit e kanë votuar mesfushorin Frank Lampard si lojtarin më të mirë të sezonit për Blutë, ndërsa kjo është hera e tretë që anglezi e merr këtë nderim.
30-vjeçari tashmë i ka kaluar legjendat e skuadrës nga “Stemford Brixh” si John Hollins, Charlie Cooke, Ray Wilkins, John Terry, Dennis Wise dhe Gianfranco Zola, të cilët e kanë fituar këtë çmim vetëm nga dy herë.
Çmimin e parë Lampard e fitoi në vitin 2004 dhe pastaj sërish në vitin 2005, ndërsa tifozët kanë vendosur që edhe këtë sezon t’ia japin këtë çmim mesfushorit të tyre.
“Është ndjenjë shumë e mirë, pasi që këtë çmim e kanë fituar lojtarë të nivelit të lartë”, ka thënë Lampard për faqen zyrtare të klubit.
Goli i Mihajll Essien kundër Barcelonës në ndeshjen e kthimit të gjysmëfinales në Ligën e Kampionëve është emëruar si goli i sezonit, ndërsa Eshli Kol mori çmimin e lojtarit më të mirë sipas votave të bashkëlojtarëve të tij.