Dy britanikë kapen me 684 kg kokainë

Dy britanikë u arrestuan në Francë, pasi që doganierët në kamionin e tyre kanë gjetur 684 kg kokainë. Siç bënë të ditur sot autoritetet franceze, droga është zbuluar rastësisht gjatë një kontrolli rutine në autostradën në afërsi të qytetit Monpele. Dy britanikët vinin nga Spanja dhe kanë planifikuar të shkojnë në Londër. Autoritete i ka shtyrë të dyshojnë mënyra e rrezikshme e të voziturit, pasi që i kanë ndalur, kamionin e kanë skanuar, me çka kanë zbuluar drogën. Ka qenë e paketuar mirë në qese dhe gypa nën thasët me rërë. Në kamion ka pasur edhe kokrra kafeje, me qëllim që të mos i zbulojnë qentë gjurmues. Të dy të arrestuarit pohojnë se nuk kanë qenë të vetëdijshëm se çfarë transportojnë në kamion.