Walker i zhgënjyer me diplomacinë kosovare

Angazhimi i diplomacisë kosovare nënë sigurimin e njohjeve për shtetësinë ka qenë zhgënjyes për ish-udhëheqësin e misionit vëzhgues të OSBE-së në Kosovë, William Walker.



Ambasadori amerikan, në një intervistë për të përditshmen “Koha Ditore” ka vlerësuar se kosovarët është dashur të përgatiten për diplomaci, meqë e kanë ditur se pavarësia do të vinte një ditë.

Sipas tij Kosova po sillet si shtet vetëm zyrtarisht, meqë ministrat e saj po mbajnë poste dhe shëtisin botën, por që ende kanë për të mësuar se si luhet loja në arenën ndërkombëtare.

“Jam i dëshpëruar me faktin se kur shkoj në disa vende të caktuara dhe i pyes se kush i ka vizituar nga Kosova, ata më thonë askush. Kjo punë s’bëhet me thirrje telefonike apo dërgim të letrave”, ka thënë Walker, i cili po qëndron për vizitë në vendin tonë.

Ai ka sqaruar se me ritmin e tanishëm, anëtarësimi në OKB nuk duket të jetë afër – ndërsa ka kritikuar edhe bashkësinë ndërkombëtare për veprim të plogësht në Kosovë.