Policia bën kallëzim penal ndaj Ivanoviqit dhe Jakshiqit

Policia e Kosovës ka iniciuar kallëzim penal kundër dy përfaqësuesve të Këshillit Kombëtar Serb në Mitrovicë: Millan Ivanoviq dhe Marko Jakshiq.



Ky kallëzim, siç thuhet, është bërë për shkak të thirrjeve të tyre publike për djegien e vendkalimeve 1 dhe 31 në veri të Kosovës, në shkurt të vitit të kaluar.

Këtë e ka konfirmuar edhe zëdhënësi i policisë së Kosovës për rajonin e Mitrovicës, Besim Hoti. Hoti tha se i mbetet Prokurorisë së Qarkut, e cila edhe ka kërkuar zhvillimin e hetimeve, që t’i nisë ose jo procedurat penale kundër Jakshiqit dhe Ivanoviqit.

Ivanoviq dhe Jakshiq i kanë hedhur poshtë akuzat, duke i cilësuar si të pavërteta dhe pabaza.