Rama: Shqipëria po ndryshon për një grusht njerëzish

Lideri i selisë rozë, Edi Rama ka ironizuar sloganin e demokratëve Shqipëria po ndryshon. Nga qarku i Korçës ku ka prezantuar detaje të programit të tij qeverisës, Rama ka thënë se ndryshimi i PD, përfshin vetëm oborrin qeveritar dhe jo qytetarët.

"Sali Berisha ju gënjeu, pasi ju gënjeu, Sali Berisha kërkon që të jeni dhe të lumtur. Është e vërtetë, Shqipëria po ndryshon, por po ndryshon për një grusht njerëzish, të cilët sot i kanë zgjidhur të gjitha problemet e tyre dhe këta janë njerëzit e familjes së kryeministrit dhe njerëzit e oborrit të kryeministrit”, u shpreh Rama.

Nga Bilishti, kryesocialisti foli për idenë e një shërbimi shëndetësor universal, që do ti shërbejë të gjithëve pavarësisht sigurimeve shëndetësore. "Pas 28 qershorit do të ketë vetëm një Shqipëri, Shqipëria e qytetarëve pa dallim të cilët do të kenë pranë shërbimin shëndetësor kombëtar që do t’i shërbejë çdo qytetari, qoftë i pasur, qoftë i varfër, njësoj me të njëjta kushte e me të njëjtin dinjitet", vijoi ai.