Marrëveshje midis Bashkisë së Tiranës dhe Barcelonës

Bashkëpunimi institucional dhe modernizimi i shërbimeve bashkiake, është në thelb të marrëveshjes midis Bashkisë së Tiranës dhe asaj të Barcelonës në Spanjë.

Marrëveshja është nënshkruar të shtunën, nga nënkryetarja e këtij institucioni, Albana Dhimitri, ndërsa për Bashkinë e Barcelonës nga homologu i saj, Carles Marti.

Bashkëpunimi, sipas marrëveshjes, synon përmirësimin e shërbimeve kryesore publike, sikurse dhe inkurajimin e zhvillimit teknologjik.

"Tashmë kemi një partner në transformimet urbane, një partner i cili është një model ndërkombëtar përsa i përket zhvillimeve urbane", theksoi Dhimitri.

Ndër prioritetet tona, vijoi ajo, janë vlerësimi i hapësirave publike, rikualifikimet urbane, shtimi i sipërfaqeve të gjelbra, krijimi i poleve në të gjithë qytetin, ku grupe të caktuara të shoqërisë do të kenë pjesën e tyre.

"Do të ketë një eksperiencë dhe një shkëmbim mendimesh dhe idesh nga bashkia e Barcelonës, që ka shënuar një risi në të gjitha zhvillimet urbane dhe sidomos në rivitalizimin e zonave të caktuara", tha ajo.