Finlanda premton bashkëpunim në fushën e sundimit të ligjit

Ministrja e Drejtësisë, Nekibe Kelmendi ka pritur në një takim ambasadoren e Finlandës në Prishtinë, Tarja Fernandez, të cilën e ka njoftuar me planin strategjik, të arriturat, si dhe sfidat dhe vështirësitë me të cilat ballafaqohet kjo ministri.

Kelmendi theksoi prioritetet e Ministrisë së Drejtësisë, duke u fokusuar në krijimin e infrastrukturës ligjore për të filluar reforma në sistemin e drejtësisë, për luftimin e korrupsionit dhe dukurive tjera negative, pastaj për reformën brenda Shërbimit Korrektues të Kosovës, etj.

Ndërkaq, ambasadorja Fernandez i premtoi ministres Kelmendi bashkëpunim të ngushtë dhe të sinqertë - duke theksuar se Finlanda është e gatshme ta mbështesë dhe ta përkrah Ministrinë e Drejtësisë me qëllim të zhvillimit të sundimit të ligjit në Kosovë.

Të dyja palët u pajtuan se do të angazhohen maksimalisht që ta thellojnë bashkëpunimin ndërmjet Kosovës dhe Finlandës në fushën e drejtësisë, sidomos në fushën e hartimit të legjislacionit, pastaj në luftimin e krimit të organizuar, trafikimit me qenie njerëzore, korrupsionit, etj