LDK nuk ka datë për zgjedhje

Lidhja Demokratike e Kosovës, pret që sa me shpejtë të përfundojë procesi i konsultimeve për caktimin e datës së mbajtjes së zgjedhjeve, në mënyrë që të dihet data definitive për mbajtjen e zgjedhjeve lokale, thanë në përfaqësues të kësaj partie.



Sekretari i përgjithshëm Ramë Manaj, në një konferencë për media tha se, LDK ende nuk ka filluar procesin e përgatitjeve për zgjedhjet lokale.

LDK-së edhe njëherë kërkoi që Komisioni Qendror i Zgjedhjeve të demonstrojë kapacitetet dhe kompetencën që ka për një organizim sa më të mirë të këtyre zgjedhjeve, gjithmonë në mbështetje të monitorimit të organizatave të ndryshme ndërkombëtare, përfshirë misionin e OSBE-së.

Sekretari Manaj bëri publik edhe vendimin e LDK-së për degët të cilat e kanë kompetencën dhe e shohin vetën jo mirë në komuna të kenë mundësi të shtojnë anëtarësinë në kryesi.

Duke folur për miratimin e rezolutës nga Organizata e Konferencës Islamike, sekretari Manaj tha se LDK-ja përshëndet aprovimin unanim të kësaj rezolute nga vendet anëtare të Konferencës Islamike, e cila i atribuohet sensibilizimit për njohje të shtetit të ri të Kosovës nga vendet anëtare të kësaj konference.

Manaj po ashtu tha se LDK vlerëson lart angazhimin që diplomacia shqiptare dhe vendet tjera bënë në përgatitje të kësaj rezolute, e cila, sipas tij pritet të ketë efektet në njohjet e reja nga anëtaret e kësaj konference islamike.