Gordon Brown riorganizon kabinetin

Pas dorëheqjes së disa ministrave britanikë, kryeministri Gordon Brown ka përpiluar një listë të re të kabinetit të tij qeveritar dhe ka theksuar se nuk do të tërhiqet nga posti, edhe pse opinioni publik britanik i ka shtuar kërkesat për dorëheqjen e tij.



Brenda vetëm pak ditësh në Britaninë e Madhe kanë dhënë dorëheqjen 7 anëtarë të kabinetit qeveritar. Kriza qeveritare në Britaninë e Madhe filloi me të ashtuquajturën "aferën e dietave" të politikanëve.

Politikanët britanikë kanë paraqitur për vite të tëra llogari kontestuese ose kanë bërë mashtrime me llogaritë e paguara me paratë e taksapaguesve.

Ndërkohë në zgjedhjet komunale që u zhvilluan të enjten, së bashku me zgjedhjet për Parlamentin e Evropës, Partia Laburiste e kryeministrit Brown - siç edhe pritej - shënoi humbje. Ndërsa Partia Konservatore ka shënuar rritje të numrit të votave në shumë qytete dhe komuna.