Zyrtare: Gourcuff nënshkruan marrëveshje katërvjeçare me Bordeaux

Bordeaux ka njoftuar pasditen e të enjtes se e ka kompletuar transferimin e mesfushorit Yoann Gourcuff, i cili këtë sezon ka qenë i huazuar te skuadra franceze nga Milani.

Gourcuff ka treguar formë të jashtëzakonshme këtë sezon duke u shpallur lojtar i vitit në Ligën e Parë franceze dhe duke i ndihmuar skuadrës së tij që të jetë shumë pranë për ta fituar Kampionatin francez (Bordeaux ka nevojë për një pikë të vetme në xhiron e fundit të Ligue 1 për t’u shpallur kampion).

Konfirmimin e transferimit e kanë bërë presidenti i Bordeaux, Jean-Louis Triaud, dhe vetë lojtari, i cili është shprehur shumë i lumtur që do ta vazhdojë aventurën me skuadrën franceze.

“Jam i lumtur që do ta vazhdoj aventurën time sportive me Girondins (Bordeaux). Vendimi im për të nënshkruar me këtë skuadër është zhvilluar gjatë gjithë sezonit”, ka thënë mesfushori.