Obama vizitoi ish kampin e përqendrimit Buchenwald

Presidenti i SHBA-së vizitoi te premten ish-kampin e përqendrimit Buchenwald, pranë Weimar-it, në Gjermani.



Obama shoqërohej nga kancelarja gjermane Angela Merkel dhe i mbijetuari i Holokaustit, njëkohësisht mbajtës i çmimit Nobel, Elie Wiesel.

Obama tha se Buchenwald-i është një vend mësimi për të qenë vigjilentë: "Ende sot ka njerëz që mohojnë Holokaustin. Por vende si Buchenwald-i janë prova më e mirë që i hedh poshtë të tilla hipoteza pa bazë. Detyra jonë është të përballemi me ata që thonë gënjeshtra mbi historinë tonë", tha Obama.
Buchenwald-i ka qenë një vend i vdekjes pa jetë, tha Merkeli në vendin përkujtimor. "Pabesim, indinjatë, nuk ka fjalë për të përshkruar ndjenjat tona për mizoritë që kanë përjetuar aq shumë njerëz, këtu dhe në kampe të tjera përqendrimi dhe shfarosjeje, në kohën terrorit nacional-socialist. Unë përulem përpara të gjitha viktimave..." , tha ajo.

Kjo është hera e parë që një president i SHBA-ve viziton kampin, i cili në prill të vitit 1945 u çlirua nga trupat amerikane. Nën regjimin nazist në kampin famëkeq të Buchenwald-it mes viteve 1937 deri 1945 humbën jetën më shumë se 56.000 vetë. /Deutsche Welle/